Sevenling (Kasalanan)

Ang sevenling ay isang uri ng tulang may pitong linya. May halimbawa sa Sevenling/Rengahan, English version.

Mga panuntunan:

Ang unang tatlong taludtod/linya ay may tatlong elemento – tatlong pangungusap na magkaka-ugnay o magkakahiwalay, o tala ng tatlong detalye, pangalan o posibilidad. Gayundin ang susunod na tatlong linyang maaaring tuwirang kaugnay o kasalungat o walang kinalaman sa naunang tatlong taludtod. Ang pampito at huling linya ang magsisilbing buod o suma ng naunang mga taludtod. Dahil sa maikli ang tula, walang takdang sukat ang sevenling bagamat makabubuting bigyan ito ng ritmo, metro o rima. Upang mabigyan ang tula ng madaling pagkikilanlang anyo, dapat itong buuin sa dalawang saknong na may tatlong taludtod at isang natatangi at pampitong huling linya. Ang sevenling ay pamamagatang gayundin kasunod ng salita o mga salita sa loob ng panaklong. Maaaring gawing misteryoso, ‘di-pangkaraniwan o nakababalisa ang huling linya, pagpapahiwatig na isang parte lang ng istorya ang isinalaysay. May taglay na kalidad ang tula na nag-aanyaya sa mambabasang manghula.

Batay sa pakikipag-ugnayan ko kay Tata Raul, walang eksaktong salin ang sevenling sa Pilipino/Tagalog kaya iyon din ang gagamitin natin. Dagdag pa ni Tata, magiging mapanghamon ang aktibidad kung gagawing Pituhan (isang umiiral na anyo ng likas na tulang may pitong pantig) ang bawat taludtod o linya, bagamat hindi ito sapilitan.

Sakay na.

 

Ugali niyang ngumisi,

magpakalasing

at malunod sa kahit anong babae.

 

Ganoon ang kanyang pagkamanhid

sa kahihiyan at kawalanghiyaan

muntik na siyang mailibing.

 

Hanggang sa Roma at si Rasputin.

Latest posts by Abraham de la Torre

Share and enjoy...

If you enjoyed and liked this post, LIKE it on your Facebook. Consider also leaving a comment below to share your thoughts with others.
avatar About Abraham de la Torre

I'm married to a lovely, loving woman who blessed me with two wonderful sons. Poetry is my passion, even if it's on a mood level. Like, I'm a geyser one moment and drained the next. Each outpouring, however, is a personal testament to truth, a poem being empty were it phony. I got the genes from my Dad, who passed away, in 2003, at 77. He was my most avid audience. There are other inspiring sources but Dad was the darnedest. Instead of miss him, I fill the void with verses.

Comments

  1. dito sa aking silid kung gabi
    sa upo o higa`y nagmumuni
    ang ngayon at bukas ng sarili

    sa ngayo`y malakas at matatag
    bukas-makalawa`y walang tibay
    asa ay salig sa mga anak

    Sa ipong kahoy ay may panggatong

    (`wag na igan, baka mangimbulo ang aking mga anak kung ikaw
    ay aking mayakap…hehehe Salamat igan.)
    Luanda, Angola
    05:52 H

  2. malapit nang isilang
    ang panganganak-tuwang
    wala pang pagsisidlan

    hanggang sa mangagkita
    mga banyagang mata
    paghaharapang mesa

    puso lang ang pantingin

    (igan, sabi ni kurdapya, ako raw ang ginawa mong coordinator, kako sa kanya, aba’y ikaw siyempre ang masusunod, pag-utusan mo lang kami.)

  3. `pag ikaw ay nagpunla ng binhi
    ay mga butil na piling-pili
    `pag sapaw ikaw ay mangingiti

    mga ginto sa dulo ng pas`yok
    tanawin mo at nakalulugod
    ang ani ng binhing itinundos

    sa ating yuko naro`n ang ginto

    -igan, kahit saan basta`t tayo`y masisiyahan: kainan, inuman, kantahan, huntahan, kaututan..hehehe dila, ur choice is my choice, sagot ko 20K salamat igang ham, magandang hapon.
    Luanda, Angola
    17:31 H

  4. sa ating yuko naro’on ang ginto —
    simpleng gawin, asal na ka-aya aya,
    ‘di na kailangang pag-aralan — pagpapakumbaba

    magkaroon ka lang ng pusong
    bukas, walang pag-iimbot, mapagparaya
    (at magagaanan ka sa pagsasagawa)

    ang nasa taas ay ibababa, ang nasa baba ay itataas

  5. ang nasa baba ay itataas
    ng papuri at pasasalamat
    maging pasigaw o anas

    hindi kailangang marinig
    ng mundo ang ulinig
    ng kalatas ng dibdib

    langit na salamin ay batis

  6. langit na salamin ay batis
    ng ligaya, nag-uumapaw na pag-asa
    at biyayang walang tigil sa pagdaloy —

    ang mga tumutuktok ay pagbubuksan,
    ang humihingi ay pagkakalooban,
    ang tumatawag ay pakikinggan.

    naaabot din ang langit

  7. naaabot din ang langit
    hindi lamang ng tanaw
    kundi pati ng dibdib

    nasa paghugot lang ng hininga
    at kalakip na pag-asa
    ang pagsikat ng umaga

    pagkalagim-lagim man ng panaginip

  8. sa isang taong nagsasalita ng tapat
    saksi ang Diyos sa mga pangungusap
    anong igsi nang saya sa kanyang palad

    ang punla ay isang buwang itatanim
    sa dal`wang pinitaka`y pagkakasyahin
    sa dal`wang lugar alin ang uunahin

    Sa kaliwa o kanan may PAGMAMAHAL

    -igang ham Oct. 10 Sabado ang maalab kong pangungumusta sa iyo at sa tropa sa ating masayang pagkikita.
    Luanda, Angola
    06:54 H

  9. saan mang direksyon lumagay
    iisa lang ang isasaalang-alang
    na tiyak ang patutunguhan

    laluna kung ang dalang baon
    ay isang dasal at mga palad na kuyom
    ang pag-asa bago mag-orasyon

    ay kamtin ang sukling taimtim

    (okey sa akin ang oct. 10, igang noel, laluna kung kasama sina tata, rose, danny, atbp.)

  10. iminulat sa aming kahirapan
    sa aming buhay ay `wag manlalamang
    isiping ang Diyos ay nakatunghay

    gayundin sa iyong mga pangako
    ganapin mo ito ng boong-puso
    luwag ng damdamin `pag nagawa mo

    Tuparin pangakong mula sa puso

    (wow ! salamat igang ham. sobra tuwa kung sila ay makasama.)
    P`wede kayang paki-kontak sila para sa masayang harapan ng
    isa`t-isa. okay sa akin igan kahit saang lugar.
    Magandang umaga igan at muli maraming salamat.
    Noel
    Luanda, Angola
    05:00 H

  11. (in-email ko na sina engel, erwin, blue angel at tata. hahanapin ko sa address book sina rose, danny at kurdapya, atbp.)

  12. saksi ang Panginoon igan, sobra ang ngiti ko parang lumagpas sa tawa ang kasiyahan nang makausap ka sa phone. Maraming salamat igan sa pagkontak sa ating mga kamakata…wow makata na nga ba ako? hehehe –> sa tulong ninyo ay natuto.
    Oct. 10 igan iinom ako ng salabat hehehe
    Muli maraming salamat igang ham.
    Luanda, Angola
    05:23 H

    • matagal-tagal na rin mula nang huli kang nagparamdam, igan. sana, ang hindi mo pagbisita rito ay hindi dahil sa karamdaman. o kalungkutan. dahil dito tayo pare-pareho nakatagpo ng lunas sa anumang nararamdaman. at hanggang ngayon ay may bisa pa rin ang mga taludturan. tell me not to worry is all i’m saying.(“,)

  13. Igang Noel, Ham

    tuparin pangakong mula sa puso
    na sa iyong pagdating sagot mo ang inumin,
    at pagkaing pagsasaluhan natin

    lalo na ang mga kuro-kuro,
    pananaw, mga kwentong buhay-paglalakbay
    upang sa amin din ay maging inspirasyon.

    … sama ako diyan!

  14. sa pangako sagot ay pag-asa
    na sa unang pagkikita
    ay dumaloy ang serbesa

    at mga bula ng berso
    kasaliw ang tono
    ng espiritu ng baso

    na may sinang ang ulo.

  15. matamis ang lasa ng bumubulang serbesa.
    pumapawi, maging sa pait ng pagdurusang
    inakala mo noo’y retasong dugtong-dugtong

    sa buhay mong tila ruwedang bumulusok at umahon.
    nanalig kang may darating, at di pa ma’y iyo nang inangkin
    dahil alam mo rin: pagpapala’y aanihin ‘pag mabuti ang itanim.

    yakap at pisil, tula, awit, aliw. natutuwa kami sa iyong pagdating.

    (para sa iyo ito, kaibigang Noel. Wala man ako’y tanggapin mo ang aking pakikisalamuha sa pamamagitan nitong mga alay kong kataga.)

  16. nagkita-kita at nagpaalaman
    nang hindi nagkita
    dahil sa isang kalungkutan

    naghiwa-hiwalay at nagkanya-kanyang
    balik sa kahong una
    tuloy ang lusong ng gulong

    hanggang sa muling pag-ahon

  17. avatar blue angel says:

    mapaghamon ang nakaraang taon
    mabuti at sa awa ng Diyos
    kahit paamut-amot nakakaahon

    kami naman, kaibigan, ay di nakakalimot
    kahit marahil ay kung saan-saan napapasuot
    o di kaya’y napapasuksok

    walang pagsidlan ang kaligayahang kayo ay nasilayan

  18. hindi naman dahil hindi nakikita
    at ang puso ay walang mata
    mabubura ang alaala

    may himig ang hangin may bulong na baon
    mahaba maikli man ang panahon
    may hangganan ang bawat prusisyon

    mabuhay ang nabuhay na muling nawalay

  19. avatar Ham de la Torre says:

    ang nabuhay ay muling nawalay
    dinagit ng palang magkasaysay
    upang pagbalik ay mag-alay

    ng mga alaalang sakbibi ng lungkot
    at tuwina’y apuhap ng ubod ng kirot
    nilisang tipanang lugod na naudlot

    iting-bagang na kayod ng pag-asang di-malunod

  20. avatar Ham de la Torre says:

    pag-asang di-malunod
    ayaw magpatianod
    sa baha hindi tuod

    gaano man kalakas
    ang alon ay humampas
    susuong babalikwas

    may dasal na katumbas

    Mga Kamakata,

    Ngayon ko lang napasyalan ang ulilang rengahan. Kako’y magpePebrero na pala, aba’y muling mag-umpisa. Tamang-tama ang arangkada sa buwang ang isang araw ay pula ang letra. Tara uli, tena!

  21. Ulila man sa pansin
    kampo ng magagaling,
    pawang nagsisilimlim.

    inuukit sa init
    ang rimang maririkit
    kahit sa loob ng dyip;

    mapipisa ang tula.

  22. avatar Ham de la Torre says:

    Mapipisa ang tula
    at muli bubulaga
    inakay na may baga

    ng alab ng panitik
    lalago mahihitik
    ang palihan ng titik;

    hanggang muling maglimlim.

  23. avatar Ham de la Torre says:

    magdadala ng punla
    upang maging himala
    hasik na pagpapala

    usbong sa ula’t apoy
    sa aruga ay lunoy
    hindi mangunguluntoy

    luntian ang daliri

  24. avatar Abraham de la Torre says:

    kamay mistulang uling
    mata ng talusaling
    namulala sa dilim

    inapuhap ang yakap
    kaulayaw na ulap
    kanina lang ay lasap

    sa kamay niya ay bula

  25. sa kamay niya ay bula
    paano mawawala
    kung ito ang anyaya

    at syang magpapawala
    sa batang naulila
    ng inang naalila

    ng awa sa sarili

  26. avatar Abraham de la Torre says:

    ang awa sa sarili
    hindi dapat isisi
    sa mga kulasisi

    na nagsilipad lahat
    iniwang buto’t balat
    ang noo;y mapaghangad

    ngayo’y hubad at hubo

  27. ngayo’y hubad at hubô
    gusto ring makaupô
    sa binukbok na buhô,

    habang ibinububò
    ang putik na mabahò
    sa kalabang pamatò,

    tyak na kabalahibo

  28. avatar Abraham de la Torre says:

    tyak na kabalahibo
    mga taga-kongreso
    at pati ang senado

    sa di na pagsawaang
    teleserye ng bayan
    isa lang ang mayaman

    iba’y uto’t-utusan.

Speak Your Mind