Sa Isang Nilalang na Nilamon ng Agos

Kaibigan,

Ano ba ang problema?

Hindi lalaya

Kung ibabaon ang sarili, ipagsisiksikan,

Sa Disyertong mayroon nang nagmamay-ari.

Huwag! Huwag pagagapi sa talas ng dila

sa talim ng pluma,

sa nagtatayugang ideya.

O ‘di kaya’y

Sa naghuhumindig nilang pilosopiya.

Sila’y inukit ng kanilang panahon!

Namnamin na lamang

ang pagkakatagpo ng iyong diwa

at kanilang panahon!

(At, maaari’y, dito sisibol, hangad

ng pulso.)

hasain ang matalim na pluma

sa buhay-na-bato

na naglalaro

sa iyong bungo.

Walang masama!

Walang mali!

Sa pag-asam

na makapiling ang mga Bituin

o makiluha sa bulaklak

o makilala si Anto

o makihati sa pandesal ni Magdalena .

Ikaw’y ikaw,

Siya’y siya,

Sila’y sila.

Ako’y ako.

Ngunit, ang ikaw ay maaaring

maging

Siya.

Sila.

Ako.

Kung iiwasan, tatalikuran, ang pagputong ng sarili, pagniig

ng anino

sa Plaridel ng Disyerto!

• Ikaw Na Lumisan - 26th August 2010
• Kung Bakit Pula At Hindi Bughaw Ang Dugo - 5th August 2010
• Nang Magkuwento Ang Ama Sa Anak - 14th July 2010
• Sinigang - 4th June 2010
• Trahedya Ng Pulubi - 4th June 2010