Mahabang Tag-Araw

kung maaari lang luha’y ipangdilig

sa lupang natuyot, ipagpag ang pawis

nilang nangaglinang sa sakahang bukid

at umaasa lang sa hikbi ng langit

dahil naiga na ang imbak na tubig.

uhaw ang maghapon sa agos ng batis

nagsawang sumibol ang palay at mais

naro’ng damong ligaw ibig nang tumangis

pagkat kahit hamog hindi tumilamsik

habang ang palaka’y magdamag tahimik.

punong walang kibo, sanga’y naging siit

lupaypay na pakpak ng maya at pipit

‘di na rin madinig huni ng kuliglig

pati mga isda ay nangaligalig

hibas na ang sapang sana’y masisisid.

ang sariwang hangin nahiyang umihip

si lolo at lola abaniko’y bitbit

halo halo sana sa uhaw pamatid

ngunit pati yelo’y takot na lumamig

dahil enerhiya ngayo’y tinitipid

may nagsapropetang malakas ang tinig

senyales daw ito, wakas ng daigdig

kinontra ng agham sa balitang hatid

sadyang mahaba raw ngayon ang tag-init

El Nino ang ngalang ngayo’y bukangbibig.

minsan ang panahon ay lubhang masungit

may pagkakataong ito’y nagngingitngit

minsa’y sumasala ang init at lamig

tila ba ang tao ay kinakalabit

upang ang dalangin ay kanyang masambit.

• mensahero ng langit - 6th March 2010
• Tula ng makata - 3rd March 2010
• Naalala mo ba ang mensahe ng EDSA - 23rd February 2010
• ikaw na ang bida ngayon - 20th February 2010
• bulaklak - 16th February 2010