Lambing Kina Ka Romy C at Henry ng Emanila

April 24, 2009

By Raul Funilas • Posted in Showcase .

Meet Raul Funilas
Leave a response

Diwa ko’y dinagit ng dalampasigan,
agad umimbulog sa may kalawakan;
layuni’y ilipad sa malayong lugar
upang ipabatid na may kahilingang
kami ay igawa kahit konting puwang
dito sa ‘ting website na tamang tinggalan
ng babalangkasing tula ng RENGAHAN.

Ang Rengang gagawin, ang huling salita’y
siyang uulitin pagdugtong sa tula;
kung ano ang dulo’y doon magsimula-
basahin ang aking tamang halimbawa:
“Nais kong rumenga mahal kong Diwata,
dahil ikaw’y laman ng baliw kong diwa;
sa gabing pusikit titingnan ay tala
habang ang mata ko’y tigmak nitong MUTA.”

Heto po sagot na dapat magawa:

“MUTA ay pahirin kasamang makata,
dahil ang mata mo ay nanggigitata;
baka ka makita ng haling na pusa
at ikaw’y punasan ng ihing SARIWA.”

Alam kong mayroong dito ay papatol,
kaya po ka Romy kayo ang humatol;
kung pagbibigyan ba ang hiling ko’t bulong?
gawin nang madali’t magdarapithapon.

Tuloy ang Pabaga!
Tula nang tula!

Tata

Latest posts by Raul Funilas

Ambus - 27th August 2010
Dalit Ng Galit - 27th August 2010
Ang Kagaw Ni Sabel - 27th August 2010
Ibinabangon Ako Ng Alon - 13th August 2010
Alapaap - 5th August 2010

Rod Escobin - LBNHS on April 24, 2009 at 1:14 pm

MAGDARAPITHAPON na nga
Gaya ng sabi ako’y papatol
Sa paggawa ng Renggang tula
Ating ituloy ang bawat kaputol

Mabuti ngang dito na lang gawin
Ang masayang tulaang rengahan natin
Kaya’t heto ako’y naririto
Ang inyong kamakatang si Rodrigo

Halina galugarin na natin ang daigdig
Ibalita sa lahat ng makakaniig
Kaligayahang ating makakamtan
Kailanma’y hindi ako MAGDARAMDAM

MANGREY on April 24, 2009 at 8:24 pm

sariwang bulaklak aking pinitas
sa halamanan may tanim na prutas
hindi pabayaan halimuyak kumupas
idambana sa puso hanggang wakas

sige na ka romy at henry simulan na ang rengahan

Ezzard R. Gilbang on April 26, 2009 at 5:46 pm

MAGDARAMDAM ang nakawil na salita ni Rodrigo
kaya’t agad kong binaltak ang kataga kong antigo
sa baul ko ng hirayang sininop at kinalburo
ngayo’y aking hinahango’t hinahain ngayong bago

Maari po, maari po, dito tayo’y magrengahan
ngunit idurugtong nati’y isang tulang s’yang susundan
hindi isang komentaryong walang paksang patunguhan
kundi tula ngunit isang paksa ang siyang kakabitan

Halimbawa ay ganito: Ang Lambingan (Ito’y Renga)
Ang sasagot ay gagamit nitong paksa ang kagaya
lalagyan lamang ng bilang kung sino ang sinundan n’ya
Kaya’t kung ako ang UNO, kailanga’y DOS naman s’ya!

Kaya’t ngayo’y binubuksan ating paksa na lambingan
Pagka’t ito ay magandang talakayin sa rengahan
May lambing ang sinisintang humihinging siya’y hagkan
Maylambing ang mutyang hindi pinapansin ang paramdam!

Ay! Naku, ang aking Tata, alam ko ang hinihimpil
ng hirayang nakatago sa isipan kapag lambing
ang usapan ng talayak, alam ko na nanggigigil
na ang iyong ikukuwento’y lambingan na walang tigil!

kuya Sam