emanilapoetry » Samut-sari

Ang Tula Ko’y Bugtong 6

dodie58 — Thu, 11 Mar 2010 02:58:44 +0000

Sa dating mga bugtong
narito ang tugon

Ang Tula Ko’y Bugtong -
Una – Pera, mabuti pa ang pera may tao ang tao walang pera

2 – Kandidato, dalhin daw sa presinto para iboto

3 – Sardinas sa Lata, matamis maanghang, di makagalaw

4 – Kamatayan, di na masasabi kung saan nakarating, nakapunta ba sa Langit na panalangin, sa lupa nagmula babalik din sa lupa

5 – Buwan Ng Pebrero, 28 araw kaya 2 o tatlo lagi kulang, sa apat na pito o Linggo isa ay panghusto Feb. 29 na leap year, ilaw ng mundo, Araw ng Mga Puso sa buwan ng Pebrero

Ang tula Ko’y Bugtong
anong Iyong tugon?

Muling nasilayan
ang sikat ng araw,
Kahapon sa buhay
maraming natikman.

Sakit ng katawan
may haplos ang kamay,
Kung ako ay ikaw
sa’n ang pupuntahan.

.. DcD/dodie

mensahero ng langit

ferdinand bajado — Fri, 05 Mar 2010 18:56:31 +0000

may isang kumatok sa pintuang pinid

layuni’y ’salita ng D’yos’ ay ihatid

aniya ang sabi maluwang ang langit

subalit ang daan ay sadyang makitid.

nagparaya ako’t tuluyang nakinig

mabuting balita’y kanyang bukangbibig

ang kaluluwa daw ligtas kung aanib

isang relihiyong tangi sa daigdig,

bagama’t puso ko’y medyo naligalig

ang tanging nasabi sa sariling tinig

‘hayaan mo akong makapagsaliksik

bago ko tanggapin ang aking pagsalig

ang katotohanan ako’y nananalig

at naniniwalang Diyos ay pag-ibig’.

Ang Txt Ko Ay Tula

dodie58 — Tue, 02 Mar 2010 02:58:15 +0000

in 160 characters para Piso lamang

Sa Ating
paggising
Thank GOD
4 aNewDay,
Ang Dasal
at Hiling
TheWholeDay
beOK.

AnoMan
angGawin
BeGuided
by His Will,
Palaging
isipin
OurLife
is With Him.

..dcd

Ayaw Ko Ng Tawag Sa Umaga

Parda Bianca — Wed, 24 Feb 2010 23:08:18 +0000

Ano, ba iyong ibinubulong mo riyan,
kanina lang ay nakita kitang ubod ng saya.
may paindak-indak kapa at parang
namumukadkad ka sa silay ng umaga.

Siguro, iyong tawag ano, galing ba
sa pinas? Aywan ko nga nakakasira
ng umaga pag unang-unang dinig
mo ay daing at may kasamang
drama. Ay! nako sino namang
magaling ang hindi maririndi niyan.

Heto, halos ipamigay ko na ang
sarili ko para makaipon man lang
ngunit wala ring nangyayari pagdating
ng katapusan… tapos lahat, walang
natitira kahit man lang pambili ko
ng damit ko.

Sino kayang maawa sa akin sa
kalagayang ito, sabagay di ako
nag-iisa ngunit labis na ito.
Gusto ko ng matapos. Gusto
kong makalimot at higit sa
lahat ayaw ko ng tawag sa umaga.

Tahanang tanikala

Parda Bianca — Sat, 20 Feb 2010 13:18:33 +0000

Ito ba ang aking pinaghihirapan
na umagang-umaga pa’y ako’y uma-alis
habang karamihan sa inyo akap-akap
pa rin ang inyong mga unan.

Oo nga’t malaki’t magarang tignan
pero di ko maintindihan kung bakit
ako’y nagsusumiksik sa isang sulok
na parang lahat ng hakbang ko’y
laging minamasdan, tama ba ito?

Iniiwasan ko lang siguro ang naka-ambang
sagutan na nanaisin kong mag-isa’t manahimik.
Nalaala ko noong akin ang isang malawak na silid
hanggang unti-unting kinamkam at ginawang
imbakan ng mga kagamitang nabiling mura.
Di naman ginagamit, mura nga pero pag marami
ay katumbas din malaking halaga.

Minsan binalak kong basta na lang umalis
pero nakatali ang aking kaluluwa sa mga batong iyan.
Kasi ginusto ko lang masabing ako’y nakatira
sa malaking bahay. May kayabangan pa pala ako.
Di ko rin pala kaya, nagmumukha tuloy akong kawawa.
Hindi lang ‘yan sobrasobra pa ang aking pagtitipid.

Tama ka kaibigan, di ko rin natatamasa ang bunga
ng aking hirap. Masahol pa ako sa alila.

***
…Kathang isip po lang ito.

Sa Mga Araw Ng Puso, Nasaan Ka?

dodie58 — Thu, 11 Feb 2010 13:08:47 +0000

Sa Tula Kong Bugtong, ano’ng Iyong tugon?

Marami ang gahol
ipit ang iskedyul,
Ang pagkakataon
susulitin ngayon.
Mayro’ng nagmamaktol
trapik buhol-buhol,
Ang gusto’y umiskor
sa maliit na room.

Parang nasa bahay
di pwedeng tahanan,
Ang nagmamahalan
may bawal at tunay.
Wala namang kalan
pero may tulugan,
Kahit sandali lang
nakaraos naman.

… DcD/dodie

Lagusan ng Ligaya

toyletter — Tue, 09 Feb 2010 05:34:14 +0000

Ang hirap maglabas

ng sama ng loob

kapag nagbabara

ang lagusan ng ligaya.

Kapag namamatay ang mga kiliti

parang halamang nalanta

sa kawalan ng init

ang isang dating mandirigmang

nawalan na ng

tindig at tindi.

Biso*

Raul Funilas — Thu, 04 Feb 2010 01:40:28 +0000

Ay, biso* ang batang may hawak na biwas,
Aayaw kumibit ayunging malapad;
Mabuti pang ikaw’y kumuha ng salap
Magtiis pag-alig sa dulong at yapyap.

Ay, biso ang batang may tangang tirador,
Hindi matamaan ang malaking ibon;
Mabuti pa yata’y kumuha’ng asarol
At iyong bagbagin ugat ng balinghoy.

Ay, biso ang batang magpalmo sa holen,
Aayaw bumaldig ang tirada’y paling;
Mainam pa yata ikaw ay kumain
Upang iyang gutom iyong sansalain.

Ay! Ay! Batang biso di magtatagumpay,
Kapag kumakalam tiya’y walang laman.

*malas, walang suwerte

Ang Tula Ko’y Bugtong 5

dodie58 — Tue, 02 Feb 2010 11:19:21 +0000

Ang tula ko’y bugtong
ano’ng iyong tugon?

Dalawa o tatlo
lagi kulang nito,
Sa apat na linggo
isa ay panghusto.

Sana ay tulad ko
ang iniisip mo,
Ilaw din ng mundo
puso ang regalo.

… DcD/dodie

kulang sa tamis

ferdinand bajado — Mon, 01 Feb 2010 04:38:00 +0000

kulang na sa tamis ang kapeng tinimpla

kaya pati langgam ay nagtatampo na

e kasi asukal lagpas ng singkwenta

ngayo’y hinahati sa isang kutsara

ang dating kaytamis nag-iba ng lasa.

ganoon din naman kahit na segunda

kahit sabihin pang asukal na pula

sa taas ng presyo hindi na makayang

magkape maghapon lagpas isang tasa

kaya mga langgam tiis tiis muna.