Ay, biso* ang batang may hawak na biwas,
Aayaw kumibit ayunging malapad;
Mabuti pang ikaw’y kumuha ng salap
Magtiis pag-alig sa dulong at yapyap.

Ay, biso ang batang may tangang tirador,
Hindi matamaan ang malaking ibon;
Mabuti pa yata’y kumuha’ng asarol
At iyong bagbagin ugat ng balinghoy.

Ay, biso ang batang magpalmo sa holen,
Aayaw bumaldig ang tirada’y paling;
Mainam pa yata ikaw ay kumain
Upang iyang gutom iyong sansalain.

Ay! Ay! Batang biso di magtatagumpay,
Kapag kumakalam tiya’y walang laman.

*malas, walang suwerte

Ang tula ko’y bugtong
ano’ng iyong tugon?

Dalawa o tatlo
lagi kulang nito,
Sa apat na linggo
isa ay panghusto.

Sana ay tulad ko
ang iniisip mo,
Ilaw din ng mundo
puso ang regalo.

… DcD/dodie

kulang na sa tamis ang kapeng tinimpla

kaya pati langgam ay nagtatampo na

e kasi asukal lagpas ng singkwenta

ngayo’y hinahati sa isang kutsara

ang dating kaytamis nag-iba ng lasa.

ganoon din naman kahit na segunda

kahit sabihin pang asukal na pula

sa taas ng presyo hindi na  makayang

magkape maghapon lagpas isang tasa

kaya mga langgam tiis tiis muna.

Hindi ako poon upang mapatawad
Ang ‘yong pagkasalang inihalintulad
Pagsabog ng bulkang kaydaming inutas,
Dahil ako’y taong umibig kaywagas
Itulak man ako sa balon ng ahas.

Kahit ano pa man ang ‘yong kasalana’y
Ikaw at ikaw din ang aking minahal,
Rindido mong diwa’y aking bubulungan
O kaya’y pahiran ang pusong sugatan;
Tubig na nanggaling sa balon ng buhay.

Saan man naroon ang iyong imahen,
Ako’y maghahanap sa gitna ng dilim;
Kahit abutin pa pupong takipsilim
Ikaw’y lililuking kawangis ng birheng
Tala’y nakaligid na ubod-luningning.

Sa daang mabato at maalikabok

Maging sa paligid na maraming bubog

Ang init ng semeto`y nakalalapnos

Sa paa natin kailanga`y sapatos

Sa ginigiliw mo kung ikaw ay popormal

Sapatos ay pakintabin nang magustuhan

Kung ito ay marumi isipin na lamang

Maruming sapatos ano pa sa tahanan

Sa kasayahan kung ikaw ay dadalo

Huwag na hindi magsuot ng sapatos

Huwag ka kapag tsinelas ang `yong suot

Don`n sa sulok mapipilitang magmukmok

Lalung-lalo na kung ikaw ay ikakasal

Makintab na sapatos siyang nababagay

Sa iyong paglakad paparoon sa altar

Biyana`y tatango sa iyong kakisigan

Maigi na sa pagkabata`y magsuot

Panapin sa paang tawag ay sapatos

Kakamtin ng mga taong ayaw magsuot

Ay mga paang -luya may kalyo at lintos

Luanda, Angola

Lunes(Segunda-feira)

11 Jan. 2010

13:10 H

Ang tula ko’y bugtong
ano’ng iyong tugon?

Di mo man sabihin
gusto ko’ng alamin,
Kung iyong narating
ating panalangin.

Nuong magkapiling
ayaw ko’ng isipin,
Kung saan naggaling
ay babalik ka rin.

Kung siya ay nasa’n
isumbong mo naman

…DcD/dodie

Ang tula ko’y bugtong
ano’ng Iyong tugon?

Aking pinagmulan
maalat matabang,
Malayang maglakbay
malalim mababaw.

Ngayon ay siksikan
hindi makagalaw,
Matamis maanghang
may mura at mahal.

… DcD/dodie

Ang tula ko’y bugtong
ano’ng iyong tugon?

Kung minsan ay solo
madalas na grupo,
Lahat tumatakbo
may baho’t may bango.

Ayaw man o gusto
lalapit sa iyo,
Duon sa presinto
siya daw dal’hin mo.

… DcD/dodie