Seenzoned

Ito raw ang patakaran sa laro,
Bibigyan ka ng barahang puro mukha.
Pag kanan Like, pag kaliwa Pass.
Dahan-dahan baka lumampas.

Pagkakataon na sigurong makachamba
Na ang nagustuhan mo, baka Like ka rin pala.
Sige lang, balasa lang, swipe lang, Tsong,
Baka swertehin ka na ngayon.

Ayun, panalo, ang match naging chat!
Hingin mo na ang number, sa Facebook i-add.
Pwede, Pare, pwede, parang may chance.
Baka pwede ang unexpected romance.

Pero bakit ganun, nung nagkita kayo,
Suot mo pa ang orig na sapatos mo,
Okay na sana, nagkalambingan,
Seenzoned pala kinabukasan!

Nakakita ka na sana ng Tinder Loving Care.
Muntik mo nang mahalikan si Tinderella.
Pero bakit kahit online tablado pa rin.
Sa umaga, seenzoned ka lang pala.

Bukas ulit, balasa pa more.
Kelan kaya totoong makaka-score?
Yung tipong #mayforever,
Hindi lang isang gabi,
Kasi nahulog ako sayo,
Naduwag lang magsabi.

28 Agosto 2015
Dahil kahit ang pag-ibig, kahit pa online, may expiration date.

Alay sa mga walang panahon o lakas para sa totoong date.

Bampira

Samahan mo akong manood sa pagsayaw ng usok
Sa ilalim ng araw ng poste sa gabi
Habang ako ay nangangatal sa hamog
Na sa nginig ng dibdib ay nagkukubli.
Ramdam ko bawat kalyo ng mga daliri mong magaspang
At guhit ng palad mong gusto kong hulaan
Ang linya kaya’y dumudugtong sa akin?
Ang linya kaya’y akin lang?
Kinukuskos mo ang aking hinlalaki
Pero nadarama ng buo kong katawan
Diyan ka lang sa aking tabi
Hintayin natin ang pagtulog ng buwan.
Natatawang tahimik dahil basa na ang ilong
Napapasinghot sa malamig na sipon
Mabigat ang braso mo sa aking balikat
Pero magaan ang aking ulirat.
Tara, halika na, gising na ang mga manok
Baka matunaw tayo pag araw ay pumutok
Hindi pwede ang sinag sa mga bampira–
Salamat sa pagsipsip sa aking kaluluwa.

24 Agosto 2015
Dahil ang pag-ibig ay parang pag-eskapo sa bahay at ayaw mo pang umuwi.

Cariño

Mahal mo pa rin kaya ako
kapag huminto na ako sa paghinga?
Kapag wala nang sakit ang braso,
ang hita, ang panga?
Kapag sa gabi ay hindi na ako ngumanganga?
Kumakalog ang balikat
O asul ang mata?
Mahal mo pa rin kaya ako
kapag ang aking papag
ay wala na sa sahig
kung saan ako namumulupot
pagkatapos na sa kamao mo’y humalik?
Kapag hindi na mahalaga
kung ang ngipin ay hindi na kumakalog?
O ang laman ng matres ay makailang beses nang nahulog?
Mahal mo pa rin kaya ako
kapag ako’y hindi na nanliliit
na parang lamok na hinahapak
sa katiting na galit?
Mahal mo pa rin kaya ako
kapag ikaw na lang mag-isa
at ako ay isa na lamang na nakakahong alaala?
Mahal mo pa rin kaya ako
kapag hindi na kayang yakapin
ng iyong mga daliri ang leeg kong
lagi mong inaangkin?

Inuukit ko sa balat
ikaw ay hahanap-hanapin
pero ngayon gabi
susubukan ko munang iahon
ang kaluluwa
mula sa dilim.

12 Hulyo 2015
Dahil may mga panahong may ibang taong dumadaan sa ibang uri ng sakit.

Bana

Mga brasong putol
na may bandanang itim
pinaso
sinunog
inalay sa hangin;
ilang kabaong pa ang kaya kong hithitin
hanggang mapasayaw
ang usok sa dilim?

Bulung-bulungan ng mga gusot na mukha
Kelan ba? Tagal naman.
Maganda pa naman sana.
Baka mapili. Baka may ugali.
Baka amoy kanal ang paa.
Baka masyadong matalino.
Baka masyadong maganda.
Matapang masyado.
Baka matalas ang dila.

Kausap ang sariling gunita
Huminga mula swelas
Hanggang kaluluwa–
Baka totoo.
Bawasan mo kaya?
Baka kulang ka pa?
O muli, sobra na.

Sumipol ang hangin ng mga ngusong sabik
Ano ka ba?
Kung sa sugal, ikaw ang winning streak.
Kumbaga sa kotse, top of the line.
Kumbaga sa mga diosa, divine.
Kung akin ka lang sana, tapos na ang SDE.
Hindi sa SM ang shopping, sa Duty Free.
Kung akin ka lang sana, breakfast in bed, tula ni Neruda, sundo, hatid,
bukas-kotse kahit hindi kawatan,
tama na ang dramarama sa hapon
hindi siya kawalan.

Nilunok ang sipon
na sa nikotina’y mapait
Hindi ko kailangan ng apelyidong ikakabit
Hindi ko kailangan ng pag-aalay sa altar
Hindi ko kailangan ng permanent scars.

Minsan ngumanga ako
isinubo ang pride

bumula ang bibig
muntik mamatay.

02 July 2015
Dahil ang pag-aasawa ay nakakatakot.

Soltera

Kakainin na naman ng ibong
metal ang pakpak
Idudura sa tuktok ng punong
may dahong sibat
Idadampi sa noong wala namang lagnat
ang gusot na kamay ng mga buhay na alamat
Haharap sa mga hukom ng matres at edad–

Matanda ka na, Ara.
Kelan ka ba mag-aasawa?
Kelan ka ba mag-aanak?

26 Disyembre 2014
Wala pa rin po akong sagot.

Panibagong hamon

Papakabila na naman tayo ng Taon
Ano nga ba ang mga nangyaring naaayon?
Sa buhay na di naman sa atin
Tandaang ito’y pahiram lamang sa atin

Patuloy ang ragasa ng alon sa pampang
Salamat sa patuloy na pagsilay ng araw
Tayo’y humihinga pa ng hangin
Hanging malinis na kung tawagi’y oxygen

Alagaan ang ating kalusugan
Mag-ingat sa ating kinakain
Gulay at prutas nagbibigay lakas
Ehersisyo ay gamot dulot ay lunas

Maging matatag nawa tayo
Sa Kalikasang pagsubok gaya ng bagyo
Humingi ng awa sa Panginoon
Na palisin ang kalamidad, iligtas ang ating nasyon

Ang pangarap ay kailangan ng sipag
Ngunit higit sa lahat ay kalooban ng Maykapal
Manatili sa matatag na pananampalataya
Laging manalangin, hawak NIYA ang buhay natin

Maligayang Pasko, Manigong Bagong Taon!

12-25-14

Lahat Gustong Sumikat

Walang pahinga kung ang tangkang

manguna ay singdama

ng pag-abot sa kanang siko

ng kamay. Kung ang kaliwa

 

ay nabati na ang nasa likuran

na wala nang kasabikan.

Itinataas ng donya ang baba

at bra sa walang-nanonood

 

na salaming-entablado. Ang mga ilaw

pinadilim at bahagya nang mailawan

sa likod ng kanyang isipang

lubog sa malabong kamahalan.

 

Papawiin sila sa lukso

lundag at talon ng espesyal

na larong walang bantay. Ng malayong

nagsasanay-pa-lang na yayang dayuhan.

Gamit

Pag ang mga bagay

lumapit

gumalaw

umikot

sumingit

mga suksok

sa butas

nagiging lakas

para sumundot

sa kutob

ng tuod

uugain ng oras

ang lupa

at aalugin

ang limot na sulok

ng salabat

at uurong ang buntot

ng dagang takot.

Pag-Ibig

Ito’y isang malakas na damdamin
Na kung minsa’y ayaw aminin
Dahil parang nahihiya
Subalit sa loob ay natutuwa
Pag-ibig sa isang katipan
Ay huwag nating pagti-tripan
Pagka’t kung siya’y magtatampo
Ay tila isang malakas na bagyo

Kaligayahan mo ang nakataya
Kung siya ay mawawala

** Ito rin yung tulang sinulat ko nitong Huebes nang pasulatin kami sa seminar na aking dinaluhan.

Pagbuklos (Pagbangon)

Hinanap ko sa cantil
an kabangang luha,
diklom an nag ugop-ugop
antes mahiling
kakupo su agom
naging sarong pisog
pumurusngak
ruminusdos pasakat
kinugos ang liwanag.

(Bikol)

Hinanap ko sa kailaliman
ang kalahating luha,
dilim ang sumiil
hanggang makita
kaniig ang kabiyak
naging isang butil
sumisinghap-singhap
bumulusok paangat
pagdaka’y niyakap ang liwanag…

Daing Patos (Walang Balot)

Hadukan an huba na paros
basaha an hiro kan dahon
dangugon an rusdos kan busay
ti’nuha an saimong gabat, lumukso.

Kugusa an saimong magurang
magmulo-mugo saimong mga aki
sa amigo maging totoo.
Dangan kaya dai ini ki patos,

daing nakatakod na kantidad.

(Bikol version)

Halikan ang hubad na hangin
basahin ang galaw ng dahon
dinggin ang lagaslas ng talon
damhin ang ‘yong bigat, tumalon.

Mga magulang ay yakapin
arugain ang mga anak
sa kaibigan maging tapat.
Lahat ng ‘to walang pabalat,

walang katumbas na halaga.

Tatak Ng Pasko

Magdiwang! Sa kadiliman magpaalaM;
Alayan, purihin S’yang nagpakababA,
Langit nilisan isang tronong maringaL
Ilaw ng sanlibutan, di magagapI.
Gula-gulanit ang lampin nang isilanG
Alang-alang sa lahing may pasang salA,
Yamang higit sa ginto ang ibinigaY
Alay, pag-asa sa sasampalatayA,
Nanghiram ng sabsaban pati libingaN
Gayak ng Kanyang kahabagan, pag-ibiG.

Pwedeng ayusan ang bahay hanggang atiP
Ayusin din ang buhay nang mapagpalA,
Sana huwag makalimutan ang MesyaS
Kristo Hesus ang pangalang kumakatoK,
Omega’t Alpha, itatak sa’yong pusO.

Ligaya ng Pasko

Bumaba Syang pasan, ating kabigatan
Regalo na nakabalot sa sabsaban
Korderong nag aalis ng kasalanan
Ng bawat isa, ng buong sanlibutan.

Nagpakababa nang ika’y maitaas
Pag ibig at sakripisyo ang namalas
Kaya naman sa kalungkutan tumakas
Ipagdiwang kapanganakan ng Mesyas.

Dumaan man ang sari-saring sakuna
Sa’ting bayan, sa sarili o pamilya;
Ang Pasko’y mananatiling maligaya,
Sapagkat ang Kanyang dala ay pag-asa.

Paskong Walang Hanggan

Ang Pasko ay di natatapos
Sa handaan o pagpapatos,
Sa bagong damit at sapatos,
Sa maligayang pagdiriwang,
Sa kabi-kabilang kainan
At sa sintunadong awitan.
Magpapatuloy itong pasko
Mangangatok sa bawat puso
Hanggang walang hanggan suma’yo.