1.
Malik-mata? Gayuma ng pangako’t pag-asa?
Alaala ng naglahong aliw?… Nasasabik–
Mahal ko, saang likong landas ka naghihintay?
Nang tayo’y maghiwalay, napigtal sa panimdim
Ang ‘yong kaluluwang nagsandata’t nakilahok
Sa bibig mo’y di pahimakas kundi pagbati
Lumusong sa luha’t hapis lambong ng ligalig
Sa ‘yong mata’y liwanag at dilim, umuusok
Ang apoy ng panaginip hamon sa tadhana.
2.
Bagwis ng diwatang lumipad, pumailanlang
Mula sa lagim ng lungsod lumapag sumugod
Binalangkas ang dagat bundok nasa’y lumaya
Patnubay ang gunitang tiniis isinumpa–
Mahal, saang mahiwagang gubat ka naglamay?
Kaulayaw ang masang dumamay lumiligtas
Nagliliyab ang lansangan nang ikaw’y lumisan—
Saang gilid ng bangin magkikita muli?
Humagip ang bagwis ng pangarap pumalaot….
3.
Mabighaning paraluman, saan ka naglakbay?
Sa balintataw ng guniguni kumikislap
Alingawngaw ng batis ang bati ng diwata
Dukha’t api’y nag-akay sa magayumang gubat
Sa bingit ng labi awit ng dalampasigan
Sa gilid ng pilik-mata biglang namilaylay
Ang bagwis ng diwatang mailap naghihintay—
Sa dulo ba ng landas nag-aabang ang yapos?
Ang pulang talang nakatanod may pahiwatig
Ng kinabukasang walang magayumang tukso
Habang ikaw’y nakahimlay sa kinabuwalan
Bumabangon ang alindog sa bawat himaymay
Ng katawang yakap ng lupa’t batis ng lambak
Natagpuan kita sa madugong pagtitipan
Ng pangako’t pag-asa, sumuway sa tadhana—
Nangahas itaya ang buhay, pinakasasabikan.
–###