Bigat

Ambigat mo. Anghirap mong mahalin.
Sabi ng isang minsan ay nagtangka rin.
Mabigat talaga, diba mahal pag may timbang?
Pag natapon ang laman, hindi ba’t kawalan?
Nasaktan ako nung una, ang harsh naman,
Pero ano ba ang problema sa katotohanan
Na ang taong tumutubo at nagkakaugat
Lumalalim, lumalago, kumakapal ang balat
Dumadami ang guhit, dumadami ang sugat
Nadaragdagan ang korona ng mga dahong nalalaglag?
Eh ano kung mabigat? Nagpapabuhat ba sayo?
Sino bang may sabing mali ang maging ako?
Masarap din ang mabigat, lalo na sa gabi-
Brasong nakadantay ng humihilik na katabi,
Hitang nakapatong sa ngawit na balakang,
Bigat ba kamo, eto, hanggang magkamanhiran.
Diba’t mabigat din ang pagbubuntis?
Tao ang dala mo sa loob ng matris-
Hindi hangin, kundi pulso at hininga,
Bigat ng buhay na magaang madadala.
Ano ba ang sablay sa pagiging mabigat?
Gramo ba ang usapan o tonelada dapat?
Bakit ba ako kinabog nung narinig ko ito,
Eh ikaw naman yata ang mahina ang buto?
Mabigat, malalim, mahirap mahalin?
Ang magaan, mababaw, nililipad lang ng hangin.

24 Hunyo 2016
Dahil lahat ng attributes ay neutral. :)
Alay sa mga taong nakakalimutang mahalin ang kagandahan ng kanilang sarili.

may pasamba ang nanay

sinukob ng mandorla

handog na ilaw

kuminintal sa tilma

yakap ang waksi

kalachuchi na lagas

hilam ng gabi

nakalutang sa dagat

paseo ng limot

sinalansan ang bato

hapay na moog

ibinakod sa kubo

taimtim ang plaza

umaga sa gumising

lagas na camia

ipinalad ng hangin

tikim ang anas

humahawak na bagin

dampi ng ulap

landi sa waling-waling

daloy sa lumot

umalagwa ang alon

paa ng bundok

hamog na sinalubong

lila ang yaman

mukad na bayoleta

gayak sa parang

tinagbaw ng sigwa

may kiling na bintana

lumaganap ang dilim

sinag ng tala

ibinaha sa hangin

waldas ang ipon

parol sa dampang-dagat

mitsa ng gatong

esperma na bulaklak

may bango ang irog

dalaw sa kamposanto

alay na lulot

haplos ng paruparo

bato sa ilang

nakatitik ang li po

dilig ng hilam

pinapanglaw na templo

tula ang saliw

dinadapil ng bangka

alak sa himbing

naglayag na makata

francia ang hapis

umaangil na bala

naliw sa masid

tinulig ng kampana