Bigat

Ambigat mo. Anghirap mong mahalin.
Sabi ng isang minsan ay nagtangka rin.
Mabigat talaga, diba mahal pag may timbang?
Pag natapon ang laman, hindi ba’t kawalan?
Nasaktan ako nung una, ang harsh naman,
Pero ano ba ang problema sa katotohanan
Na ang taong tumutubo at nagkakaugat
Lumalalim, lumalago, kumakapal ang balat
Dumadami ang guhit, dumadami ang sugat
Nadaragdagan ang korona ng mga dahong nalalaglag?
Eh ano kung mabigat? Nagpapabuhat ba sayo?
Sino bang may sabing mali ang maging ako?
Masarap din ang mabigat, lalo na sa gabi-
Brasong nakadantay ng humihilik na katabi,
Hitang nakapatong sa ngawit na balakang,
Bigat ba kamo, eto, hanggang magkamanhiran.
Diba’t mabigat din ang pagbubuntis?
Tao ang dala mo sa loob ng matris-
Hindi hangin, kundi pulso at hininga,
Bigat ng buhay na magaang madadala.
Ano ba ang sablay sa pagiging mabigat?
Gramo ba ang usapan o tonelada dapat?
Bakit ba ako kinabog nung narinig ko ito,
Eh ikaw naman yata ang mahina ang buto?
Mabigat, malalim, mahirap mahalin?
Ang magaan, mababaw, nililipad lang ng hangin.

24 Hunyo 2016
Dahil lahat ng attributes ay neutral. 🙂
Alay sa mga taong nakakalimutang mahalin ang kagandahan ng kanilang sarili.

Latest posts by Carla Zaldivia

Share and enjoy...

If you enjoyed and liked this post, LIKE it on your Facebook. Consider also leaving a comment below to share your thoughts with others.
avatar About Carla Zaldivia

Si Buena Carla F. Zaldivia ay isang self-proclaimed Cebuana na naging Ilongga, pero true-blue Cavitena. Siya ay mukhang glamorosa sa umaga habang nakikipagbeso-beso sa mga tao sa hotel, pero patang pata naman pagdating ng bahay sa dami ng trabaho. Minsan rin siyang naglaro ng pagiging diosa sa loob ng isang kwartong puno ng empleyadong nagpipilit magpilipit ng dila para maiwasan ang pagpapalaganap ng prostitusyon tuwing wiwikain ang "Visit Cebu because we have a lot of beautiful and exquisite beaches."

Dati siyang nakikipagpatintero sa mga elektronikong liham sa isang Call Center sa Laguna, habang nakikipagpalitan ng malagkit na tingin sa mga titik na bunga ng maghapon o magdamag na kapipindot.

Noon ay isa siya sa mga maiingay na guro sa Departamento ng Humanidades sa Unibersidad ng Pilipinas Los Baños. Nagturo ng pakikipagtalastasan sa wikang Ingles, pangongopya ng mga pagsisiyasat nang hindi nabibisto, at kung paano magbihis nang hindi nahahalatang pang-ilang ulit mo nang isinuot ang pirasong iyon sa isang linggo.

May plano siyang maging triathlete ngunit hindi pa rin siya marunong lumangoy o magbisikleta.

Paborito niyang salita at gawain ang soliloquy kahit maraming ibang tao sa paligid.

Speak Your Mind