Baliw na Pagmamahal

February 4, 2010

By Noel Reyes • Posted in Pag-ibig at Pagmamahal .

Meet Noel Reyes
Leave a response

Email this post to friends

Tanging araw ng aking pagsilang

Hunghang na naghihintay nang masuyong bati

Kung bakit ang hungkag na puso`y alumpihit

Gabing-gabi na`y binabayo pa ang dibdib

Igan malapit nang pumutok sa silangan

Hindi pa rin gumigitaw ang hinihintay

Garapa`y taob na katawa`y lumulutang

Malapit nang sumilip ang bukang-liwayway

Wala pang dapo sa kawad ng telepono

Ang mahal na ibong sumakabilang dako

Kabanuan ang asam ng windang na puso

Nangangapa sa dilim ang aninong bigo

Bakit pag-ibig na nag-ugat ng malalim

Bakit ayaw mamatay kahit na bunutin

Ang tontong likidong iniinom ng bibig

Ay pinipilit takpan ang guwang sa dibdib

Salamat kasama ko sa alab na bigay

Nababaliw ang isip sa loob ng kural

May pintuan kaya o isang kahibangan

Paano tatakas sa isang kabaliwan

Luanda, Angola

04 Feb. 2010

Huwebes

Dito sa aking silid

Likido sa kopita ang tanging kasama

Latest posts by Noel Reyes

Naaalala Kita - 4th August 2010
Teka Lang Naman - 21st July 2010
Pribilehiyong Mga Sandali - 19th June 2010
Salamin Sa Mata - 27th May 2010
Sa Ihip ng Hangin...Noon - 10th March 2010

dodie58 on February 4, 2010 at 6:17 pm

Igan,

“Happy Birthday”

Sa’yong kaarawan
wala man si Mahal,
Kami’y narito lang
ikaw’y sasamahan.
Kahit sa tula lang
ay mararamdaman,
Kaibigang tunay
lagi mong tandaan.

Iyong kabaliwan
di man matakasan,
Isipin na lamang
na hindi ikaw lang.
Mayro’ng nasa kural
duon na pumanaw,
Ang palad kaibigan
parehong kumapal.
(ngekkk)

“talagang ganyan lang”. (ito tama)

Igan, Magsaya ka dyan, kami’y narito lang

OliverCarlos on February 4, 2010 at 11:01 pm

Igang Noel,

Sa dakilang araw ng iyong pagsilang
damhin mo sa puso ang pagbating bukal

ng isang kaibigang tulad mo’y hiwalay
hinahanap-hanap ang mahal sa buhay

yayamang tayo ay tulad-kapalaran
sa malayong pook nakipagsapalaran

nararamdaman ko ang bigat na atang
diyan sa dibdib mong tigib-kalungkutan

marapatin mong ikaw ay saluhan
kung gayo’y kukunin ang sunod na tagay
para sa iyo igan, kampay! inom! kampay!
kapwa man malungkot, sige, igan, tagay!

Noel Reyes on February 5, 2010 at 2:10 pm

Igang dodie,

ramdam aking igan
ang iyong pagdamay
ang tula mong alay
pulutan sa tagay

kabaliwan ko igan
ay nasa isip lang
pasan ng dayuhan
ay ang kalungkutan

buti ngang isipin
sa aking panimdim
ang sa iba`y higit
sukdol hanggang langit

aking igang tapat
maraming salamat

igang noel

- – -

igang oliver,

salamat igan sa pagsalo ng tagay
medyo napapabilis na nga ang kampay

ang kaakibat nitong pandadayuhan
ay ang dagan sa dibdib na kalungkutan

kung bakit kasi puso`y may pakiramdam
sa kalungkutan tagay ang inilaban

ang tagay igan sa akin ay ibalik
bayaan mong mag-alab ang aking dibdib

kung mag-init na at mundo ay gumiling
sasalipadpad na ang mga pasanin

salamat igan sa alo at pagbati
pasasaan ba at hindi mangingiti

igang noel
Luanda, Angola
Biyernes
(Sexta-feira)
05:10 H

Log in to Reply