Paglangoy ng Prinsesa ng Mga Bituin
Paglangoy Ng Prinsesa Ng Mga Bituin
Pulos dagim-papawirin ang bumabalot sa lugar
Romblon, kalapit ng Burias. Isang barkong lula’y daang
Iginiya ng timonel na sabi’y maraming alam,
Nabigador na bihasa sa lawak ng karagatan.
Sablay ang gawang disisyon nang ipasiyang ibirit—
Elisi ng barko’y tangkab-bahura at tumagilid
Sa tapat ng San Fernando. Hindi narinig ang tinig
At ni walang nakakita sa Prinsesang ubod-rikit,
Bitwing lumangoy sa dagat at tuluyan nang sumadsad,
Ilang oras ang dumaan at ang lahat ay nagulat,
Takot ang nagbadya’t luksa ang bumabalot sa dagat;
Umiikot-ipoipo ang tulong ng maglalayag.
Isang trahedya na dapat ay hindi na nauulit
Ngunit ang mga may-ari ng barko’y mga suwitik.
30 Hunyo 2008
UP-Diliman
Other posts by Raul Funilas
Share this post with friends
June 30th, 2008 at 11:46 pm
Sa paglangoy ng prinsesa
na pumalya ang makina
at nang biglang mabahura
tungki na lang ang nakita!
si Frank daw ang s’yang may sala!
sulpicio raw ang problema!
coast guard daw na nagpaarya!
kapitan daw na lumarga!
sisihin daw ay PAG-ASA!
overload daw ang kargada!
guidelines ang deperensya!
ang malas daw ay si gloria!
ang bulok daw ay sistema!
si bayaning puro porma!
si gentlemang puro gasta!
si dyesebel na sirena!
baha kasi sa espanya!
banggaan sa avenida!
trapik kasi dun sa EDSA!
mahal kasing gasolina!
sa bigas ay pumipila!
mahal kasi ang de-lata!
tambak kasi ang basura!
etsetera! etsetera!
kuya Sam
June 30th, 2008 at 2:24 pm
Tata,
Pangkaisipan po ang inyong tula, humahamon ng isip. Maganda po. Marami po akong nakukuhang talasalitaan sa inyong mga tula.