Serbisyo Publiko
Umuwing aburido
sa asawang nalito
si Jacintong sorbetero
matapos ireklamo
doon sa presinto
ang sumagasang awto
na di huminto ang takbo.
Ang sabi ng kabo;
kailangan sa asunto
ang patotoo ng mediko
at akusa ng abugado.
Nilagnat ng husto
itong si mang Jacinto
kaya’t itinakbo
sa hospital-publiko.
Wala na raw kwarto,
ang ward ma’y okupado.
Gagawan daw ng remedyo;
pero kailanga’y deposito,
maghanap daw ng aabono.
At may nakapagpayo
na magpunta sa munisipyo
o maghanap ng NGO
o ahensya ng gobyerno;
kailangan lang daw ay endorso
ng mataas na politiko;
o ang natipong mga resibo
ng ospital at serbisyo;
kaylangan din ng rertrato,
o kahit nakunan ng video.
Lalong naagnas ang bubungang yero
sa panaghoy na tudong-todo,
pagkat si Jacintong naargabyado
ay namatay sa tetano.
Asawa’y napasaklolo,
ngunit tutulong kaya’y sino?;
para sa ataul at sa nitso.
Kapitbahay na osusero,
nagsabi “ah, sigurado!
pagkamatay ng asawa mo
ay wala pang sertipiko
kaya hindi maidederetso
ang bangkay sa sementeryo
ng Tsino o Pilipino!”
Other posts by Ezzard R. Gilbang
Share this post with friends
