Sitio San Ysiro (Kanlungan ng Mandirigmang Bayan)
(Alay sa mga-amang dating armadong mandirigma na taga Sitio San Ysiro)
Bukang liwayway,
Dumadaloy ang hamog
Sa tangkay ng talahib;
Sinusuyod ng sariwang amihan
Ang anit ng kabundukan
At batuhang dahilig-patag
Sa Sitio San Ysiro.
Usad-ahas sa buhanginan
Ang araro ng bayang gising
At lupang nahahapis,
May darag at angas ang mga eskombro;
Nagpupumiglas at tumitilamsik
Sa malagkit na pulang lupa.
Humahalinghing ang halumigmig ng kadiliman
Sa magdamag na pangangaligkig ng batisan,
Matingkad ang pagkakapula
Ng bundok Bintug Alimutog;
Kumakaway at wumawagayway
Ang uhay ng ginintuang butil sa parang.
Naninilip ang nanganglilisik na mata
Sa siwang ng palarinringang binutas ng lumbay,
May rumiripeke sa tuod na kalatong;
Umaalingawngaw na may naliligaw—
Nagbabadyang may mga panauhing taga-patag
Sa lupang pangako ng Sitio San Ysiro.
Labit-labit na kinakalabit
Ang mitsa at lente ng katotohanan
Ng mga bagong salta sa Sitio San Ysiro,
Mga progresibong batang luwal
Doon sa Pamantasang binukalan
Ng angaw at yutang prinsipyo.
Ang pagsusuplungan ng mga pinangakuan
Ng mga pangakong walang katuparan,
Pangakong ipinako ng ulyaning gobyerno
Sa mga taga lupang pangako sa bundok ng Rizal
Na umaasa at nag-iisip
Sa gawing kaliwa
Ng maalamat na Sierra Madre.
Pebrero 11, 2004
Pook Katutubo, Sitio San Ysiro, Bgy. San Jose, Antipolo Rizal
Other posts by Raul Funilas
Share this post with friends
