Orasyon sa Dapithapon
Kabilin-bilinan nina lola’t lelong,
Tuwinang sisilim pulang dapithapo’y
Tumakbong pauwi’t sa altar pumaro’n
Lumuhod, magdasal, bendito’t orasyon.
Ngayong ako naman ang nagiging lolo,
Isinasalin ko sa ‘king mga apo
Ang pamanang bilin sa ‘king pagkatao;
Upang di mawalay orasyo’t bendito.
Ako ay nagbitin ng isang batingting
At pinatutunog sa hapong lililim,
Araw sa kanlura’t agad dumarating
Ang anak ko’t apong dasal ay taimtim.
Ang huli kong usal matapos lumuhod,
Magdasal sa altar: “Anak tayo ng Dios.”
Sa harap ng altar
ika-anim ng gabi
Pook Amorsolo
Other posts by Raul Funilas
Share this post with friends
