Payak na pangarap
Isang sikmurang kumakalam,
pagkaing panis papatulan,
paglunok ay pikit ang mata,
lunas sa buhol na bituka-
panulak, tubig na mapakla.
Kaylan ba magkakaroon ng
katuparan ang kahilingang
lumang tsinelas mapalitan,
damhin ng yayat na katawan
isang desenteng kasootan.
Na lansangan hindi pasyalan,
At ‘di bangketa ang tulugan.
Sadya bang kapalaran na ang
maging salat sa kaalaman,
at ibaon ng kamangmangan.
Karapatang ipinagkait
sa isang murang pag-iisip
katulad ng mga magulang
pagiging dukha ang larawan
hanggang sa kanilang paglisan.
Paano nga ba sisimulang
pulutin pang isa- isa at
ipunin ng isang palad
ang mga nagkalat niyang
pira-pirasong pangarap.
Other posts by deegey
Share this post with friends
