Mahal na kita, aking makata! (Kay Don Bustamante)
Kay tagal kong nakalikmok
Sa madilim na sulok
Nagmamasid
Nag-aabang
Nagbabakasakali
Na may titigil
Magtatanong
Kung anong kinikimkim
Nitong mapanibughong puso.
At ikaw ay dumating
Tumigil
Nag-abot ng kamay
Hindi nag-imot ng panahon.
Tinibag mo ang pader
Na siyang aking mundo
Sumilip sa siwang
Ng aking munting daigdig.
Binuong muli ng iyong mga tula
Pira-pirasong bahagi ng aking mundo
Mga salitang naging tulay
Upang baybayin
Suungin
Ang makitid at madilim
Na pasilyong likmuan
Ng pag-iisa
Kalungkutan.
Nililingkis ako ng mga titik
Marahang binabalutan aking katawan
Mula sa panlalamig ng gabi.
Gumagapang ang mga linya
Na tila ligaw na bulaklak
Dumidikit sa kuwadradong pader
Nilalakbay ang aking braso
Patungo sa aking dibdib.
Nadarama ang iyong daliri
Tulad ng mga taludtod
Bumabakat sa aking balat
At buong pagkatao.
Aaaahh!!
Mahal na kita, aking makata!
(Isinulat habang nagsasaya sa pagkakapanalo ni David Cook sa American Idol.. )
Other posts by fretzie
Share this post with friends
May 25th, 2008 at 5:11 pm
Nagkukulay makopa na ang aking pisngi Don…
May 23rd, 2008 at 10:26 pm
ano pa nga ba ang nais mamutawi sa labi kundi ang isang pasasalamat sa pagmamahal, fretzie.
May 23rd, 2008 at 5:35 pm
Sa mga makukulit na salita..salamat Don
May 23rd, 2008 at 5:29 pm
Hindi ko pa alam Deegey…hahaha! Maaring totoo..maaring hindi.. :)Abangan na lang natin..
May 22nd, 2008 at 9:56 pm
Mapapalad naman ang mga makatang natutuhan niyong mahalin. Natatandaan ko na may ganitong tema ring ginawa si deegey, hehe.
Balitaan niyo na lamang ako sa pagpipiging ng inyong mga puso..sa piling ng mga makatang nanunungkit ng mga aranya sa kalaliman ng gabi.
May 22nd, 2008 at 6:05 pm
Sa paglisan ng isang mahal
asahang may bagong pag-ibig
sa iyong buhay ay daratal.
Tutuo Fretzie? =)